भागीनाथ नरोडे यांच्या नेतृत्वाखाली विकास आणि आध्यात्मिक उन्नतीचा संगम….

गंगापुर/गणेश म्हैसमाळे

: तालुक्यातील झोडेगावच्या उपसरपंचांनी केवळ शासकीय योजनांच्या प्रभावी अंमलबजावणीतच नव्हे, तर धार्मिक व सामाजिक एकतेच्या दृष्टीनेही एक महत्त्वाचा आदर्श उभा केला आहे. त्यांच्या मार्गदर्शनाखाली गावात ना केवळ भौतिक विकास घडला आहे, तर आध्यात्मिक आणि सामाजिक समृद्धीच्या दिशेनेही एक नवा अध्याय लिहिला गेला आहे.

गावात विहिरी, शेततळे, घरकुल योजना, पाणीपुरवठा योजना आणि ड्रेनेज लाईनची प्रभावी उभारणी करण्यात आली आहे. संपूर्ण गावात सुस्थितीतील ड्रेनेज लाईनमुळे आज कुठेही दुर्गंधी जाणवत नाही, स्वच्छतेचे आणि आरोग्याचे उत्तम वातावरण तयार झाले आहे. यामुळे गाववासीयांचे जीवनमान लक्षणीयपणे उंचावले आहे आणि त्यांच्या चेहऱ्यावर समाधान, आनंद व विश्वासाचे भाव दिसून येतात.याबरोबरच, धार्मिक सप्ताह आणि सार्वजनिक राम मंदिराच्या उभारणीने गावाच्या सांस्कृतिक ओळखीला एक नवा रंग दिला आहे.

धार्मिक सप्ताहाच्या आयोजनाने गावात धार्मिक वातावरण निर्माण झाले असून, प्रत्येक वर्षी साजरा होणारा हा सप्ताह गावातील सर्व वयोगटातील नागरिकांना एकत्र आणतो. एक आस्था, एक भावना आणि एक चांगल्या जीवनाची संकल्पना सर्वांमध्ये रुजवली जाते. या माध्यमातून गावकऱ्यांना धर्माच्या महत्त्वाचा अनुभव मिळतो व आपसी एकतेला बळकटी मिळते.राम मंदिराच्या उभारणीने गावातील आध्यात्मिक आणि सांस्कृतिक प्रगतीला नवी दिशा दिली आहे. ग्रामस्थांच्या एकत्रित सहभागातून उभारलेले मंदिर आज गावाच्या एकात्मतेचे प्रतीक बनले आहे.

तसेच, सार्वजनिक सभागृहाच्या उभारणीने गावाच्या सामाजिक व सांस्कृतिक जीवनाला नवा आयाम मिळाला आहे. या सभागृहात आजवर अनेक सामाजिक, शैक्षणिक व सांस्कृतिक कार्यक्रम यशस्वीरित्या पार पडले आहेत, जे गावातील सर्व वयोगटांना एकत्र आणतात.झोडेगाव आज विकास, धार्मिकता आणि सामाजिक एकतेचा सुंदर संगम असलेले आदर्श गाव म्हणून ओळखले जाते. सरपंच व उपसरपंच, ग्रामपंचायत सदस्य यांच्या नेतृत्वाखाली गावाने समृद्ध भविष्याकडे वाटचाल सुरू केली असून, प्रत्येक नागरिकाच्या जीवनात नव्या आशा आणि आत्मविश्वासाचे संचार झाले आहे.

“झोडेगावच्या सर्वांच्या कष्टांमुळे आणि एकतेमुळे आज आम्ही एक समृद्ध आणि विकसित गाव म्हणून उभे आहोत. सर्व शासकीय योजनांच्या प्रभावी अंमलबजावणीतून गावाचे रुपांतर एका आदर्श गावात झाले आहे. विहिरी, शेततळे, घरकुल योजना, रस्त्यांची दुरुस्ती आणि प्रभावी ड्रेनेज व्यवस्थेमुळे प्रत्येक कुटुंबाला थेट लाभ मिळाला आहे. धार्मिक व सांस्कृतिक कार्यक्रमांनी गावातील एकतेला बळ दिले, तर राम मंदिर उभारणीमुळे आध्यात्मिक उन्नती साधली आहे.”— भागीनाथ नारोडेउपसरपंच, झोडेगाव

:

ग्रामविकास अधिकारी मुख्यालयी राहत नसल्याने कामकाजावर परिणाम

“ग्रामविकास अधिकारी मुख्यालयात नियमित न राहिल्याने ग्रामपंचायतीच्या विविध विकास कामांमध्ये विलंब होत असल्याचे नागरिकांचे म्हणणे आहे. आपत्कालीन परिस्थितीत त्वरित निर्णय घेण्यात अडचणी येतात, अशी तक्रारही नागरिकांनी व्यक्त केली आहे.

भिल्ल समाज जागेआभावी घरकुल योजनेपासून वंचित

“झोडेगावमधील स्थानिक भिल्ल समाजाला अद्यापही घरकुल योजनेचा लाभ मिळत नसल्याचे चित्र आहे. वनहक्क कायद्यांतर्गत (Forest Rights Act, 2006) त्यांच्या वस्तीला कायदेशीर मान्यता मिळावी आणि घरकुल लाभ मिळवून देण्यासाठी कार्यवाही करण्याची मागणी जोर धरू लागली आहे.”